എംഎം കമ്മത്ത്
കൊച്ചി:
പതിറ്റാണ്ടുകള് നീണ്ട കരിയറില് മോഹന്ലാല് ആദ്യമായി സംവിധാനം ചെയ്യുന്ന 'ബാറോസ് : ഗാര്ഡ്യന് ഓഫ് ഡി'ഗാമാസ് ട്രെഷര്' എന്ന ത്രീ ഡി സിനിമയുടെ പൂജ ഇന്ന് രാവിലെ കൊച്ചിയിലെ കാക്കനാട് നവോദയാ സ്റ്റുഡിയോയില് നടന്നു.
മെഗാസ്റ്റാര് മമ്മുട്ടി, പ്രിയദര്ശന്, ഫാസില്, സത്യന് അന്തിക്കാട്, സിബി മലയില്, സുരേഷ് കുമാര്, ലാല്, ദിലീപ്, പൃഥ്വിരാജ്, സിദ്ദീഖ്, സുചിത്ര മോഹന്ലാല്, സുപ്രിയ മേനോന് ഉള്പ്പടെ സിനിമാരംഗത്തെ നിരവധി പ്രമുഖര് ചടങ്ങില് പങ്കെടുത്തു.
ആശിര്വാദ് സിനിമാസിന്റെ ബാനറില് ആന്റണി പെരുമ്പാവൂരാണ് ചിത്രത്തിന്റെ നിര്മ്മാണം.
1984ല് പുറത്തിറങ്ങിയ ഇന്ത്യയിലെ ആദ്യ ത്രീഡി ചിത്രമായിരുന്ന 'മൈ ഡിയര് കുട്ടിച്ചാത്തന്' സംവിധാനം ചെയ്ത ജിജോയുടെ കഥയെ ആസ്പദമാക്കിയാണ് മോഹന്ലാല് സിനിമയൊരുക്കുന്നത്.
പോര്ച്ചുഗീസ് പശ്ചാത്തലമുള്ള പിരീഡ് സിനിമയാണ് 'ബറോസ്'. വാസ്കോഡഗാമയുടെ നിധി സൂക്ഷിപ്പുകാരനായ ഒരു ഭൂതമാണ് 'ബറോസ്'. നാനൂറ് വര്ഷങ്ങളായി നിധിക്ക് കാവലിരിക്കുന്ന 'ബറോസ്' നിധിയുടെ യഥാര്ത്ഥ അവകാശിയെയാണ് കാത്തിരിക്കുന്നത്. നിധി തേടി ഒരു കുട്ടി ബറോസിന് മുന്നിലെത്തുന്നതാണ് സിനിമയുടെ പ്രമേയം.
കൂടാതെ ഇന്ത്യക്കും ആഫ്രിക്കക്കും പോര്ച്ചുഗീസിനും ഇടയില് നിലനിന്നിരുന്ന കടല് മാര്ഗ്ഗമുള്ള വ്യാപാരബന്ധവും സിനിമയില് ചര്ച്ചചെയ്യും.
മോഹന്ലാല് തന്നെയാണ് സിനിമയില് പ്രധാനകഥാപാത്രമായ 'ബറോസ്' എന്ന ഭൂതത്തെ അവതരിപ്പിക്കുന്നത്.
പൃഥ്വിരാജും ചിത്രത്തില് ഒരു പ്രധാന കഥാപാത്രമായി എത്തുന്നുണ്ടെന്ന പ്രത്യേകതയും ബറോസിനുണ്ട്. ചിത്രത്തില് പാസ് വേഗ, റാഫേല് അമാര്ഗോ എന്നീ സ്പാനിഷ് താരങ്ങളും അഭിനയിക്കുന്നുണ്ട്. വാസ്കോ ഡ ഗാമയുടെ റോളില് റഫേല് അമര്ഗോയും ഭാര്യയുടെ റോളില് പാസ് വേഗയും അഭിനയിക്കുക. കൂടാതെ സിനിമയില് സഹതാരങ്ങളായി യുഎസ്, പോര്ച്ചുഗല്, ഘാന എന്നിവിടങ്ങളില് നിന്നുമുള്ള താരങ്ങളെത്തുന്നു.
2019 ഏപ്രിലില് ഔദ്യോഗികമായി പ്രഖ്യാപിച്ച 'ബറോസ്' മോഹന്ലാലിന്റെ സ്വപ്ന പ്രൊജക്ട് ആണ്. കഴിഞ്ഞ വര്ഷം ചിത്രീകരണം ആരംഭിക്കേണ്ടിയിരുന്ന സിനിമ കോവിഡ് കാരണം നീട്ടിവെക്കുകയായിരുന്നു. ബറോസിന്റെ സംഗീതം നിര്വ്വഹിക്കുന്നത് തമിഴ്നാട് സ്വദേശിയായ 13 വയസുകാരന് ലിഡിയന് നാദസ്വരമാണ്. 'ലിഡിയന് ഇന്ത്യയുടെ നിധി'യെന്നാണ് എ.ആര്. റഹ്മാന് വിശേഷിപ്പിച്ചത്. ചിത്രത്തിന്റെ ഛായാഗ്രാഹകന് സന്തോഷ് ശിവനാണ്. പ്രൊഡക്ഷന് ഡിസൈനര് സന്തോഷ് രാമന്.
Online PR - CNA.